О Дому школярох

Дом школярох функционує у рамикох Основней и штреднєй школи „Петро Кузмяк“. То предносц хтору треба визначиц же то єден будинок так же школяре нє траца свой час на путованє до школи.


У Дому єст 70 места за школярох ґимназиї и напряму туристично-готелиєрски технїчар. У хижох за школярох ше находза од два до пейц посцелї, а розпорядок дзецох ше окончує на основу їх жаданьох и реалних можлївосцох. Же бизме школяром оможлївели квалитетнєйше пребуванє и дали им адекватни условия за интелектуални и социялни розвой, попри хижох за школярох у истим будинку Дома постоя и два заєднїцки просториї за шицких школярох хтори жию у интернату. Перша просториято „компютерска учальня“ у хторей дзеци розполагаю зоз компютерами, проєктором зоз платном, телевизором, а шицко тото можу хасновац за ученє або за пополньованє шлєбодного часу. Друга заєднїцка простория то дньове пребуванє хтора ма улогу велькей дньовей хижи у хторей ше школяре опущую, пию кафу або патра телевизию.



Школска терпезария то место дзе ше дзецом каждодньово рихта костиранє и дзе постої вибор єдзеня хтори задоволя рижни смаки. Под час шлєбодного часу дзеци можу хасновац фискултурну салу и бавиц фодбал, кошарку, атлетику, столни тенис або одбойку. Постої можлївосц вежбац у терховнї, а у школским дворе постоя терени за мали фодбал и кошарку.



Школяре хтори любя кнїжку можу нащивйовац школску библиотеку хтора ма коло 6500 кнїжки, а тиж и валалску библиотеку хтора мавельо векши фонд.

Спортске дружтво „Русин“ и Дом култури, тиж дзецом даваю можлївосц же би ше озбильнєйше пошвецели своїм гобийом.