Клуб рецитаторох

Школски клуб рецитаторох основани концом першого полроча, 16. децембра 2020. року. Творели го тройо школяре шестей класи котри роками були успишни рецитаторе на шицких уровньох змаганя у рецитованю и 20 младши школярe и школярки зоз другей, трецей и штвартей класи.
Робота клубу рецитаторох ше одвивала у двох сеґментох:
1. Робота зоз прешлорочнима побиднїками Месней смотри у рецитованю и їх пририхтованя за дальши змаганя;
2. Робота зоз заинтересованима дзецми зоз нїзших класох и їх пририхтованє за наступ на школским стретнуцу рецитаторох.
1. Понеже ше тогорочни змаганя у рецитованю на шицких уровньох орґанизовали прейґ патреня знїмкох рецитаторох, обновйованя прешлорочних победнїцких писньох, у сотруднїцстве зоз Домом култури у месце, зняти побиднїки у шицких катеґорийох: Доротеа Рамач и Исак Новта у младшим возросту, Яна Варґа, Ема Живкович и Иван Планчак у стреднїм возросту.
После наступу на Општинскей смотри рецитованя у Кули, 30. 3. 2021. року, пласман на Зонске змаганє завжали Доротеа Рамач, Исак Новта, Ема Живкович и Иван Планчак. Вони штверо 13. и 14. априла участвовали на Зонскей смотри рецитованя у Бачу и шицки виборели пласман на Покраїнску смотру.
Покраїнска смотра отримана 12. мая у Сечню, тиж так, у онлайн формату.
Златни дипломи и пласман медзи 18 найлепших рецитаторох у Покраїни завжали Исак Новта и Ема Живкович. Исак завжал и пласман на републични уровень. 52. смотра рецитаторох Сербиї отримана 29. мая у Валєве и на нєй у младшим возросту рецитовал Исак Новта.
2. У роботи рецитаторскей секциї од початку другого полроча активно робели двацецеро дзеци зоз другей, трецей и штвартей класи. Робота ше состояла зоз заєднїцкого вибору писньох за рецитованє, розгварки о змисту вибраних писньох, виразним читаню стихох и їх ученю напамят и виразним рецитованю. Свою роботу презентовали 21. 04. 2021. кед у школским голу отримане Стретнуце рецитаторох нашей школи. Стретнуце збогацели и найлєпши рецитаторе зоз висших класох, котри и водзели конферансу. На Стретнуцу присуствовали шицки школяре нїзших класох и їх учительки, управа школи, як и предсидатель Националного совиту Руснацох. Звити зоз того стретнуца були на програми РТВ 2 у руских емисийох, як и у тижньових новинох Руске слово и дзецинским часопису Заградка.
Проблеми у роботи були вязани за специфични условия пре епидемиолоґийну ситуацию, дзе було чежко ускладзиц роботу по ґрупох. Же би ше заобишло мишанє дзецох зоз розличних класох, робота була орґанизована у менших ґрупох, цо злєпшало ефикасносц, алє ше страцело сотруднїцство и позитивни медзисобни вплїв дзецох розличних возростох.

Проєкт финансовани зоз боку Покраїнского секретарията за омладину и спорт, хтори обезпечел средства за опрему за роботу на далєкосц.