Проєкт „Саям науки”, финансийно потримал Покраїнски секретарият за образованє, предписаня, управу и национални меншини-национални заєднїци ма циль же би през интерактивни роботнї промововал сучасну науку и єй применьованє у каждодньовим живоце, як и же би указал на значносц науки при защити животного штредку, витворйованю цильох отримуюцого розвою у диґиталним швеце. Покраїнски секретарият обезпечел средства за материяли за роботнї. Проєкт ше одноши на интердисциплинарни приступ и єден є од найсучаснєйших способох ученя природних предметох и математики, и препознати є од интернационалней образовней заєднїци. Школа „Петро Кузмяк” лидер у СТЕМ настави, як у нашей жеми, так и звонка єй гранїцох. Пре окремни резултати котри витворела, школа, спомедзи двасто школох, вибрана за амбасадора европского проєкту „STEM School Label”.

Наукове образованє барз значне у нєшкайшим швеце котри ше у велькей мири опера на науково одкрица и технолоґию. Саям науки порушує школярох же би ше занїмали зоз науку нєпоштредно, алє на интересантни способ. Так школяре мотивовани же би учели природни предмети и математику, а зоз тим и посциговали лєпши резултати. З интересованьом за науку, школяре ше унапрямую и у напряму професийох котри ше базую на природних наукох и математики. Окреме ше порушую дзивчата же би вжали учасц у роботньох, прето же ше вони слабше опредзелюю за будуци занїманя у обласци науки.

Школа пред пандемию окреме успишно орґанизовала три Сайми науки, так же зоз тим проєктом знова обновена традиция наукового образованя. Тот проєкт порушує здобуванє наукових компетенцийох през нєформални роботнї, розвиванє тимскей роботи и парняцкого ученя. Крайня подїя и реализация проєкту була на Дзень школи, 25. мая.