Дзень людзких именшинских правох означени у нашей школи зоз отвераньом вистави уметнїцких фотоґрафийох у школским холу под назву ,,Руски дзивки,, Виложени 30 фотоґрафиї дзивкох облєчених до автентичного руского народного облєчива вицагнутого зоз бабових орманох. Виставу нащивели, зоз притримованьом епидемиолоґийних мирох, три ґрупи школярох нїзших  класох основней школи котри маю нєпоштредну наставу у школи. Завод за културу войводянских Руснацох суфинансовал фотоґрафованє и виробок уметнїцких фотоґрафийох Петра Дешича.

За школярох отримана и годзина зоз националней историї Руснацох и приповедка о народним руским облєчиве котру реализовали актив учителькох и педаґоґ школи Любица Няради котра обдумала годзину и приповедку за школярох. На концу годзини школяре добили задаток вибрац єдну фотоґрафию котру нарисую и пошлю до дзецинского часопису ,,Заградка,, бо ше 17. януара будзе преславйовац Дзень Руснацох, националне швето рускей националней заєднїци котре вязане за урядове насельованє Руснацох на тоти простори.