Школяре Основней и штреднєй школи зоз домом школярох „Петро Кузмяк“ участвовали у проєкту „Interreg – IPA CBCˮ Мадярска – Сербия под назву „Стари звикнуца, нови облєчива“, котри отримани од 24. по 27. юний у Калочи у Мадярскей.

Попри школярох керестурскей школи, участвовали и школяре зоз Економско-тарґовинскей школи зоз Кули, члени  мадярского културного дружтва Непкер, тиж зоз Кули, як и школяре зоз Калочи зоз Мадярскей – вєдно 40 школярох штредньошколского возросту. Тот проєкт финансира Европска уния  и представя програм прейґгранїчного сотруднїцства у погранїчним реґиону Мадярскей и Сербиї. Проєкт потримує розвой стабилного реґиону обраценого спрам сотруднїцства, як и унапредзованє вкупного квалитета живота у погранїчних обласцох. Тиж, оможлївює економске сотруднїцство орґанизацийох зоз двох державох, пестує заєднїцки идентитет як и културне и историйне нашлїдство погранїчних обласцох. Шицки були змесцени у месце Дунапатай, такой при озеру Селид, нєдалєко од Калочи. За школярох були орґанизовани рижни роботнї на котрих вони могли виражиц и розвиц свойо способносци у тимскей роботи, танцу, ґлуми и шпиваню. У шлєбодни час ше могли купац на озеру, а за шицких учашнїкох була орґанизована нащива Ерґели, дзе домашнї отримали интересантну представу зоз конями. Зоз керестурскей школи участвовали школяре зоз I 1 и III 2 оддзелєня, а зоз нїма були професор историї Деян Бучко и директорка школи Хелена Пашо Павлович. Понеже представнїки зоз Калочи у септембру того року планую нащивиц Кулу и Керестур, на тот завод, керестурска Школа будзе мац нагоду указац свойо госцопримство.