

Од 2. по 6. октобер, у Студентским одпочивалїщу „Радойка Лакич” на Авали, нашо школярки участвовали у едукативней програми ҐеймЛаб (GameLab) – Мисия: бависко за превенцию насилства, пошвеценому розвою дружтвених бавискох як алата за ученє, сотруднїцтво и превенцию насилства медзи младима.
У програми участвовали Милица Гайдукович, школярка першей класи напряма туристични технїчар, и Сара и Яна Савич, школярки першей класи ґимназиї.
През активносци програми школярки здобували знаня о розличних формох насилства, розвивали креативни идеї, здумовали и вирабяли прототип дружтвеного бависка, а потим го и тестирали. На тот способ розвивали свойо схопносци, креативносц и способносц за тимску роботу.
Цешиме ше у наших школяркох котри указали порихтаносц учиц, стварац и зоз своїма идеями допринєсц вибудови сиґурнєйшого и побудзуюцого окруженя за шицких младих.



