Школяре трецей и штвартей класи и професоре Основней и штреднєй школи «Петро Кузмяк» нащивели Саям образованя „Путокази“ стреду, 04. марца 2020. року.

Тот саям то покраїнски проєкт, а за циль ма промоцию образованя за шицки возрости и афирмацию доживотного школованя, як и професионалне информованє и ориєнтацию школярох и квалитетни вибор факултета и дальшого школованя и вибору професиї и професионалного напредованя.

Саям нащивели у цилю професионалного информованя и ориєнтациї и препатрунку образовних профилох у штреднїх школох и факултетох. Школяре обишли штанди на Сайму, препатрели понуканє образовних профилох у рамикох понуканьох високошколских установох и факултетох зоз Сербиї и иножемства.

Почим у орґанизациї сайма робене и вреднованє квалитету роботи образовних установох у вецей катеґорийох школа пририхтала приклади добрей пракси и конкурисала у катеґориї основношколского образовая и освоєла златну медалю за квалитет образовно-воспитней роботи.

Тото признанє од велькей важносци за школу, бо зоз тим препозната успишносц и анґажованє у шицких сеґментох вреднованя квалитету хтори покриваю роботи школи як цалосци. Тота медаля потвердзенє же професоре школи робя квалитетно, провадза тренди сучасного образованя цо препознате нє лєм у рамикох школи алє и на медзинародним уровню.