У цеку марца мешаца у нашей школи зоз школярами отримани роботнї о безпечносци на интернету хтори ше у нашей школи реализую у рамикох проєкта „Инициятива за диґиталну безпечносц”. Роботнї отримала директорка школи, а цали проєкт ше одноши на безпечне хаснованє диґиталних технолоґийох и едукацию о диґиталней безпечносци у руралних подручох. У вше повязаншим швеце виложени зме рижним ризиком на мрежи, уключуюци онлайн насилство, крадзу идентитета, онлайн спреводзки, фалшиви висти и потупенє приватносци. Циль того проєкту же би школяре, родичи и наставнїки у руралних штредкох змоцнєли знанє и схопносци хтори потребни за безпечне хаснованє интернета, правилне приношенє одлукох, чуванє особних податкох. Окрем диґиталней писменосци, проєкт ше занїма зоз зроднима темами як цо то медийна писменосц, диґитална безпечносц дзивчатох, понеже вони у векшей мири угрожени, як и безпечне хаснованє штучней интелиґенциї.