Наша школа часц проєкта VR4Clima дзе ше школяре з помоцу VR технолоґиї занїмаю з єдну барз важну тему як цо то климатски пременки.

Шведки зме же ше климатски пременки случую вшадзи коло нас и же постої велька потреба же би ше о тим приповедало и на годзинох.

З помоцу нових технолоґийох и сучасних приступох як цо то рахункарски бависка, школяре на прилагодзени способ звладую и упознаваю ше з тоту тему.

Скорей ярнього одпочивка школяре осмих класох мали нагоду пробовац верзию бависка креированого так же би цо лєпше усвоєли поняца вязани за климатски пременки, алє и же би ше занїмали з превенцию и защиту од нєжаданих пошлїдкох климатских пременкох.

У проєкту окрем нашей школи участвую Intelligent system laboratory, Центер за промоцию науки, National technical University of Athens, 16th Experimental Primary school of Lamia, потримани є з боку Европскей униї.