Пондзелок зме у нашей школи преславели Швето яри, нам познатши як китайски Нови рок. То була ище єдна нагода же бизме ше стретли зоз нашима сотруднїками зоз Кинфуцийового институту Иниверзитету у Новим Садзе.

На преслави мали зме нагоду чуц дацо вецей о способу означованя того швета у Китаю о чим нам бешедовали Елена Шомодї, Ема Живкович и Каролина Пап. Уживали зме у звукох гармоники хтори нам виведол школяр Теодор Гарвильчак, одушевели ше зоз сучасним танцом хтори нам представела школярка Заря Ковач, а окреме нас одушевели школяре пиятих класох хтори виведли найпознатшу китайску новорочну дзецинску писню „新年好呀“, як и народну руску писню „Вежнї зайду“.

Школяр Исак Новта представел ше зоз рецитацию писнї „З твару обрацени ґу морю, яр розквита“ сучасного китайского поети Хай Зия, указуюци одличне знанє и чувство за китайски язик.

З тей нагоди директорка Институту, Чен Сю, уручела награди нашим школяром основней школи хтори участвовали на конкурсу за найкрасшу новорочну розгляднїцу. Од вкупно осемдзешат роботох зоз дзевец школох, нашо школяре достали два подзекованя, завжали аж седем треци места и єдно перше место, хторе припадло школярки Софиї Сопка.

Тиж так, школяр Исак Новта достал припознанє Конфуцийового институту за участвованє на ґала преслави кинтайского Нового року у Беоґрадзе, а наставнїца Мая Брекайло преглашена за науспишнєйшого позарядового наставнїка Конфуцийового институту у 2025. року.

Мали зме нагоду уживац у чаривносци старих китайских схопносцох тайдїчуена и калиґрафиї, чий перформанс нам пририхтали лекторе Институту.

То була ище єдна успишна преслава Ярнього фестивалу и потвердзенє красного и плодотворного сотруднїцтва нашей школи зоз нашима китайскима товаришами.