Школяре наприяму туристични технїчар Основней и штреднєй школи зоз домом школярох «Петро Кузмяк» зоз Руского Керестура и того року участвовали на змаганю зоз обласци туризма хторе орґанизоване 30.03.2017. року на Универзитету Синґидунум у Новим Саду.

У рамикох студиї случаю «Диґитална комуникация у туризме Сербиї», 18 екипи зоз штреднїх школох Войводини мали можлївосц презентовац свойо резултати виглєдовацкого проєкту, идеї и ришеня. Циль проєкта було же би ше школяре положели пред реални проблеми, укажу здобуте знанє, розвиваю креативносц, и же би ше школяре по першираз нашли у улоги креатора туристичного понуканя за младих.

Зоз нашей школи участвовали 3 екипи наприяму туристични технїчар и їх менторе (наставнїки): Тияна Николич, Оксана Милияшевич, Йован Станкович — ментор Аника Войчена; Катарина Никитович, Марина Радоєвич — ментор Єлена Миркович; Виолета Ґаґич, Дуня Костич — ментор Аника Войчена.

Жири бул у составе: Проф. др Владимир Джамич, продекан ФТХМа, др Мирослав Кнежевич, доцент и Предраг Обрадович, маркетинг и ПР менаджер Универзитета Синґидунум.

Шицки три екипи «ошлєбодзели» свой креативни дух и доказали же доросли виволаньом у швеце туризма.

Тим у хторим були Тияна Николич, Оксана Милияшевич, Йован Станкович под менторску роботу Аники Войчена указал винїмкову ориґиналносц, креативносц и применку резултатох и идейох и пласовал ше на 4. место од 5 наградзених а освоєли и єднодньови вилєт у орґанизациї Универзитета Синґидунум.