У сотруднїцтву зоз нашу школу, 7. новембра бул реализовани проєкт ,,Парняцки караван интеркултурней едукациї” хтори  потримал Покраїнски секретарият за образованє, прописи, управу и национални меншини, а хтори орґанизовало здруженє ,,Хумана – дружтво за потримовку дзецинства и младосци” зоз Бачкей Паланки.

Тройо школяре зоз першей класи руского оддзелєня, Корнелия Будински, Єлена Фейди и Дарко Провчи, 7. новембра придружели ше своїм парняком зоз Кули, Червинки, Вербасу и Бачкей Паланки у каравану интеркултурнейедукациї. На тей цалодньовей драги обишли Сримски Карловци, Бачки Петровец, Будисаву  и на концу пришли до Керестура.

На тим  путованю школяре ше упознали зоз културу, образованьом и обичаями Словацох, Сербох и  Мадярох на тих просторох. Зоз историю Руснацох, як и образованьом у Керестуре упознала их Люпка Малацко, професор руского язика и кнїжовносци, а зоз значносцу и историю нашей церкви о. Михайло Малацко.