Школяре першей класи ґимназиї и напряму туристични технїчар 10. септембра нащивели музей у Руским Керестуре.

Тота активносц реализована у рамику годзини историї на тему „Историйни жридла — докази о прешлосци”, котру орґанизовала професорка историї Любица Илич.

У музею их дочекала Любица Няради, педаґоґа и воспитачка у Доме школярох, як и предсидателька туристичного здруженя Руского Керестура, котра Кузмяковцох упознала зоз способом живота, звичаями и културу Руснацох од присельованя на тоти простори та по нєшка.

Попри обиходзеня будинку „Замок” у котрим ше дараз отримовала и настава, школяре у музею могли видзиц розлични предмети зоз скорейшого живота жительох Руского Керестура, народни ношнї, фотоґрафиї.

З тоту нащиву школяре збогацели свойо знанє о животу, култури и звичайох Руснацох, котре им, як часц общей култури, будзе од велького хасну.