Нєшка вчас рано ґимназиялци першого и другого року одпутовали до Италиї у рамику програми мобилносци школярох, Еразмус плус. Штернацецеро школяре вєдно зоз своїма професорками, Соню Чапко и Лїляну Рудакиєвич, буду пребувац дзешец днї у городу Фросиноне нєдалєко од Риму и буду ходзиц на наставу вєдно зоз своїма парняками з Италиї, а акцент того року будзе на унапредзованю диґиталних схопносцох, комуникациї, алє и еколоґиї. Директорка школи, Наталия Будински, гварела же то красна нагода за школярох зоз малого руралного штредку же би у рамику европских проєктох нащивели европски метрополи, як и же би научели нови схопносци хтори битни за конєц штредньошколского образованя. Школа се вше намага у складзе зоз Розвойним планом же би подзвигла квалитет настави на найвисши уровень. У фокусу и школяре ґимназиї и туристичного напряму, и у остатнїх даскелїх рокох маме винїмково резултати, нашо школяре окончую фахову праксу у иножемству.

Як гвари координаторка проєкту, Лїляна Рудакиєвич, школа ше витворела у обласци медзинародних проєктох и уж чишлї коло дзешец активни проєкти, а найвецей тих за мобилносц школярох. Тото з чим ше можу похвалїц то вшелїяк два Еразмус плус акредитациї, єдна за ґимназию, а друга за туристични напрям, цо значи же школяре буду исц роками на мобилносци у нашей школи. Тераз ше планує и мобилносц наставнїкох. Вона надпомла же тоти проєкти у подполносци финансує Европска уния.