Цали тот тидзень преткани зоз ТОЛЕРАНЦИЮ. Школяре вєдно зоз своїма учителями и учительками, оддзелєньскима старшинами, професорами, правели панои, плакати, робели роботнї и бешедовали на тоту тему. У роботнї, »Баш крашнє же зме шицки розлични«, хтору орґанизовал Тим за превенцию насилства вєдно зоз професорку подобовей култури, участвовали вецей як стоцецеро дзеци хтори любя и знаю рисовац, та ше могли визначиц и указац свой талант за рисованє. Мили нашо хтори читаце тоту обяву »ДЕЦЕ ИМА РАЗНЕ, АЛ’ ЈЕ СВАКО ДЕТЕ ЛИЧНОСТ. РАЗЛИКЕ НИСУ КАЗНЕ, У РАЗЛИКАМА ЈЕ НАША СЛИЧНОСТ«.

БУДЗМЕ ТОЛЕРАНТНИ КАЖДИ ДЗЕНЬ!

Пробуйце, нє чежко:

Почитуй свойого товариша/товаришку гоч сце различни и нє складаце ше у шицким.

Почитуй думанє других.

Прилап добре предкладанє.

Нє допущ анї себе, анї другим же бисце зоз ґрупи виключели дакого лєм прето же нє випатра як ви, нє шпива як ви, нє може бежац так швидко як ви, нє люби фодбал, прето же нє зна математику лєбо ю зна лєпше од шицких…

Алє, нє забудз и тото:

Толеранция нє значи же шицко муши буц так як ви сцеце.

Толеранция нє значи же шицко шицким допущене, алє же шицки маю исти права.

Толеранция ше учи, исто як цо сце научели поздравкац сушедови, поскладац свойо ствари, як математика, лєбо гоч хтори други предмет у школи.

Толеранция: ПОЗИТИВНЕ СТАНОВИСКО, ТОВАРИШСТВО, СЛУХАНЄ, ШЛЄБОДА, РОЗГВАРКА, ВИРА, ПОЧИТОВАНЄ, СЦЕРПЕЗЛЇВОСЦ, ДОГВАРКА, МИРОЛЮБИВОСЦ…