Наш подкаст „Зоз Петрового угла“ наградзени зоз похвалу на Националним Euroguidance змаганю кариєрного совитованя.

Награду 25. октобра на Euroguidance конференциї у Беоґраду прияла директорка школи.

Подкаст „Зоз Петрового угла“ проєкт школярох и наставнїкох нашей школи, котри потримало Министерство просвити през проєкт „Учме шицки вєдно“.⁣

Подкаст порушани на инициятиву директорки Наталиї Будински, а виробели го школярки Мария Горняк, Минеа Югас и Наталия Жирош, котри прешлого школского року пририхтали и зняли першу сезону пошвецену женом и дзивком у швеце STEM-а (Science, Technology, Engineering and Mathematics).

Подкаст през розгварки чежи ґу тому же би розбил предрозсудки и же би указал на значносц полней ровноправносци кед ше вибера занїманє у обласци природних наукох и математики. Тиж, циль и промовованє образованя през сучасни форми комуникациї и инспирация младих зоз автентичнима приповедками женох и дзивкох зоз локалней заєднїци котри ше остварели у своїх професийох або ше ище находза пред вибором своїх будуцих занїманьох.⁣

Кед же сце ище не запровадзели, запровадзце YouTube канал @podkastizpetrovogugla