МАША КЕРЕКЕШ

Винчуєме Машо и жадаме ци вельо успиху у дальшим школованю.

~Мено ми Маша Керекеш.⁣

Бивам у Кули и мам 18 роки.⁣

Цешим ше же ми родичи Радмила и Ненад и же сом Невенова шестра.

Ишла сом до Основней школи ,,Петефи Бриґада” зоз котрей ношим красни памятки и пред’знанє котре ми вельо значело у дальшим школованю.⁣

Кед сом ше пред штирома роками уписовала до штреднєй школи, нє була сом сигурна цо наисце сцем, алє сом од свойого першого школского дня у школи ,,Петро Кузмяк” похопела же сом направела добри вибор.⁣

Школски днї прецекали швидко зоз добрима професорами котри нам на першим месце були пайташе, з вельочисленима звонканаставнима активносцами, праксами звонка нашей жеми, награднима путованями…⁣

Два раз сом ишла на фахову праксу – до Солуну и до Лиону.⁣

Двотижньова пракса у Солуну ми наисце указала у пракси шицко тото цо сом потамаль учела у школи – од того як функционує робота служби на поверхох до роботи у служби костираня. Нажаль, другираз кед требало же бим ишла на праксу до Солуну, того року, датуми врацаня зоз пракси и Републичне змаганє ше поклопели – анї у єдней хвильки сом ше нє покаяла же сом жертвовала одход на праксу.⁣

Под час пракси у Солуну класна ми спомла же постої проєкт Intervet WB за мобилносци у иножемству. Приявела сом ше зоз любопитлївосци, без даяких очбекованьох же достанєм нагоду одпутовац даґдзе. Погришела сом. На лїстини було вецей як 80 школяре зоз Сербиї, а мойо мено було 1. на лїстини. Мешачна пракса у Лиону ми дала можлївосц же бим робела на рецепцийней служби дзе сом мала полни роботни час и робела зоз госцами готелу. Думам же тота пракса була єден од факторох котри уплївовали на мой високи пласман на Републичним змаганю.

Верим до своїх моцох и способом на котри сом представяла свою школу у предходних штирох рокох – на праксох у иножемству, саймох, промоцийох, змаганьох зоз спорту, язикох и Републичним змаганю зоз аґенцийного и готелиєрского водзеня роботи котре ме наведло же бим лєгчейше принєсла важни одлуки у живоце як цо то по котрей драги далєй рушим и у котрим напряму ше унапрями мойо дальше образованє.~