Сердечно Вас витам з нагоди того значного ювилею од 270 рокох иснованя Школи „Петро Кузмяк” хтори нєшка означуєме. Значносц хтору ма тота школа за руску, алє и за локалну заєднїцу и єй образованє, нємерлїва, а тирванє хторе ше тераз уж рахує зоз виками, представя своєфайтови феномен пошвеценосци єдному од найважнєйших сеґментох людскей цивилизациї, а то образованє.

Без огляду як ше часи меняли, и яки бул историйни контекст, верим же и нашо предходнїки стали пред истима виволанями, як и ми нєшка: а то на хтори способ унапрямиц дзеци и младих людзох на праву животну драгу. Бо, живот нєпредвидлїви и часто поставя опрез нас задатки хтори нє написани у учебнїкох и чийо ше ришеня находза скрити глїбоко медзи шорами.

Як и през 270 роки, так и нєшка, єдно сиґурне – през животни виволаня лєгчейше кед за собу маце школу. И прето важне чувац кажду школу, а окреме тоту Школу „Петро Кузмяк”, бо тота школа наша и за каждого од нас, пре даяку окремну причину, важна.

З тей нагоди виражуєм подзековносц шицким хтори през 270 роки доприношели Школи „Петро Кузмяк”, а окреме тим хтори нєшка доприноша и оможлївюю же би вона и далєй тирвала, а то наша локална заєднїца, заняти и школяре на хторих остава же би чували и предлужели традицию и образованє у тей школи.