Шветочне отверанє Мейкерс лаба було, попри преслави 270 рокох постояня школи, причина же би ше зишли наставнїкове, школяре, представнїки школскей и локалней самоуправи, алє и представнїки локалней привреди.

У мено Ґрупи за образованє котра ше состої од Нордеус фондациї, Центра за промоцию науки, Досцигнуца младих у Сербиї и Инициятиви Диґитална Сербия, присутним ше обрацели руководителька Сектору за програмово активносци Центру за промоцию науки Даниєла Вучичевич, вивершни директор Достигнуца младих у Сербиї Дарко Радичанин, Милош Дюричанин, директор стратеґиї и розвою Нордеус фондациї, як и Небойша Бєлотомич, директор Инициятиви Диґитална Сербия. У мено школи преповедали директорка школи Наталия Будински, и Ясминка Надь, помоцнїца директорки и наставнїца хемиї, а школяре представели свойо науково проєкти и инициятиви на сайму науки котри бул часц отвераня Мейкерс лаба и послужели госцох зоз чайом котри пестую у своєй мудрей заградки.