Вчера у ранших годзинох керестурски ґимназиялци одпутовали до Болонї у Италиї.

На мобилносц одпутовали 15 школяре котрих провадзи їх наставнїца Лїляна Фина.⁣

Тото путованє значна активносц у Акредитованим Еразмус плус проєкту котри реализує школа #petrokuzmjakskola

У Италиї школяре буду исц до штреднєй школи, зоз цильом же би ше розвили медзипредметово компетенциї школярох зоз акцентом на поднїмательству.

Под час тей мобилносци школяре буду робиц на бизнис идеї котру, док ше враца, буду имплементовац до школских звонканаставних активносцох.

Координаторка проєкту, Лїляна Фина, гварела же то велька нагода же би школяре здобули знаня и схопносци котри преписани зоз Европскима рамиками компетенцийох и за тото достаню одвитуюци сертификат.

Вона додала же школа успишно реализовала уж два проєкти мобилносци школярох, кед школяре туристичного напряму ишли на двотижньову праксу до Солуну.

Тераз нагоду за унапредзованє знаньох у иножемству достали ґимназиялци, а тото цо окремно значне же школяре ґимназиї на руским и сербским наставним язику и шлїдуюци три роки буду исц на тот вид мобилносци.⁣

Школа „Петро Кузмяк” у остатнїх даскелїх рокох реализовала вельке число проєктох, як националних так и медзинародних, и зоз тим постала водзаца школа у околїску цо ше дотика нагодох за осучасньованє настави и змоцньованю у кариєрного водзеня школярох ґу дальшому запошлєню и предлужованю школованя. ⁣

Програми Еразмус плус у подполносци финансує Европска Уния.