Проєкт котри ше занїма зоз тему „жєлєних” обнавяюцих жридлох енерґиї орґанизую члени Департману за инжинєрство защити животного штредку (Факултет технїчних наукох, Универзитет у Новим Садзе) зоз финансийну потримовку Амбасади ЗАД у Беоґрадзе, у рамику Алумни проєкту Фулбрайт Алумнисти професора Неманї Станисавлєвич.

То шести рок по шоре реализациї тей файти Фулбрайт Алумни проєкта, дзе ше зоз сотруднїцтвом зоз Департманом за инжинєрство защити животного штредку реализую проєкти у штреднїх школох ширцом Сербиї. Рециклованє амбалажи (СКАР проєкт) була тема першлого року, док другого року штредньошколци дознали вецей о одпаду як енерґенту (ОКЕй проєкт). Трецого року окремне огляднуце було на самим концепту циркуларней економиї (CIRCLЕ проєкт). После того 2019/2021. отримани онлайн преподаваня и роботня о актуалней проблематики наставаня и управяня зоз одпадом од єдзеня и можлївосцох хаснованя того типа одпада зоз цильом защити животного штредку (FOODY проєкт), док ше тема прешлорочного проєкту базовала на проблему климатских пременкох (KLIMI проєкт).

Тогорочна тема обдумана же би информовала и едуковала штреньошколску популацию зоз окремним огляднуцом на актуалну проблематику „желєних” обнавююцих жридлох енерґиї, котри хвильково од найвекшей значносци маюци у оглядзе шветово виволанє зоз подмирйованьом енерґиї. Школяре и професоре зоз 15 вибраних штреднїх школох буду участвовац у вецей розличних активносцох окремно обдуманих же би додатно едуковали школярох о релевантней теми желєних обнавююцих жридлох енерґиї. Попри штреднєй школи зоз Нового Саду, проєкт ше будзе реализовац и у других варошох ширцом Сербиї: Беоґрад, Сримска Митровица, Лозница, Ниш, Бор, Руски Керестур, Бач, Зомбор, Суботица, Вербас, Вершец и Ниш. До проєкту уключени 15 штреднї школи и прейґ 250 учашнїки зоз цалей держави.

Друга по шоре роботня отримана пондзелок, 23. 1. 2023, а участвовали школяре зоз штреднєй школи „Петро Кузмяк” зоз Руского Керстура. Роботня була отримана нєшка, 26. януара, у Бачу.

Проєкт ше фокусовал на едукациї школярох штреднїх школох о поняцу „желєней енерґиї”, обнавююцих жридлох енерґиї (ОЖЕ), енерґетским потенциялу обнавююцих жридлох енерґиї, доступних технолоґийох, о тим як направиц „желєну” енерґию котра применююца зоз найменшим можлївим дїйством на животни штредок, воздух, воду, жем, биодиверзитет и здравє людзох, як и о локалних и реґионалних акцийох за имплементацию и хаснованє „желєней енерґиї”.

Тирванє проєкту предвидзене у периодзе од септембра 2022. року до септембра 2023. року. Додатна анкета о проєктних активносцох будзе реализована у октобру и децембру 2023. року.

Представнїки школи, єден наставнїк и єден школяр, буду поволани на закончуюце случованє на Универзитету у Новим Садзе. Проєктни тим будзе орґанизовац конференцию на котрей представнїки школох през усну презентацию представя свою школу и резултати свойого задатку. Тиж так, кажда школа достанє сертификат о успишним участвованю у проєкту, а найлєпши тим будзе преглашени и достанє пенєжну награду.

З оглядом же енерґетски сектор найважнєйша часц привреди, змоцньованє обнавююцих жридлох енерґиї може мац значне дїйство на економски, алє и отримуюци розвой жеми. Маюци у оглядзе тоти факти образованє младих ґенерацийох и їх активне уключованє до акцийох зоз тематику обнавяюцих жридлох енерґиї випатра вше значнєйше у поглядзе розвою „желєних” енерґетских рамикох дружтва.