„Дзецко то дзецко, же бисце го любели и розумели”

У нашей школи ше под час Дзецинского тижня орґанизовали рижни нащиви, роботнї и друженя зоз хторима зме уподполнєли тот тидзень на радосц школярох.

Школяре нїзших класох основней школи под час Дзецинского тижня нащивели ЯКП „Руском”, валалску библиотеку, музей, Дом култури, „Саям старих ремеслох” у дому ремеселнїкох. Окрем того, участвовали у емисиї радио Нового Саду, у квизу „Забавна математика”, дзе им процивнїки були парняки зоз Коцура. Правели интересантни подобово роботи у креативней роботнї, а на годзинох физичного воспитаня мали рижни интерактивни бависка. Тиж так отримана роботня „Здраво ше кармим – здраво рошнєм” дзе школяре мерали свою висину и чежину. Под час цалого тижня зазберовали ше сликовнїци и кнїжки за дзеци, хтори дзеци на концу однєсли до оводи же би ше дзеци радовали.

Школяре висших класох мали рижни квизи, правели панои вязани за Дзецински тидзень, нащивели Месну заєднїцу, правели дружтвени бависка и илустровани кнїжки за дзеци зоз дзецми зоз предлуженого пребуваня зоз котрима ше з тей нагоди и дружели. Отримана промоция дрона як наставного средства, школяром штредньошколци отримали презентацию на хторей представени локациї хтори интересантни за путованя. Окрем того, даєдни школяре ше и звонка школи дружели зоз своїма класнима старшинами.

У штреднєй школи тиж так отримана медийна промоция Дзецинского тижня дзе школяре давали вияви за радио Нови Сад – емисию на руским язику. Школяре правели панои, отримане спортске змаганє у одбойки и промововани здрави способ костираня. Даєдни школяре пририхтовали квиз „Забавна математика”. Школяре туристичного напряму на паноу представели школяром основней школи предкладаня знаменїтосцох и локацийох у Войводини. Тиж так нащивени и „Саям старих ремеслох”. Школяре ше опробовали и у „меняню улогох” на даєдних годзинох, а даєдни ше дружели у предлуженим пребуваню основней школи зоз школярами, дзе правели винчованки хтори у октобру буду подаровани старшим людзом.

У Дому школярох орґанизована Кухарска роботня на хторей воспитаче и школяре правели домашнї кекси на машинки.