Пондзелок, 30. авґуста, коло 80 школяре нашей школи у провадзеню наставнїка Деяна Бучка участвовали у акциї чисценя базену у Руским Керестуре, а за потреби знїманя емисиї З веслом през Войводину, познатей авторки Тамари Ґруїч, а водитель и учашнїк знїманя бул популарни беоґрадски ґлумец Виктор Савич.

У тей роботней акциї хтору орґанизовала Месна заєднїца Руски Керестур, попри наших школярох участвовали и члени Добродзечного огньогасного дружтва, члени орґанизациї Треш хиро з Керестура и други жителє и волонтере.

Гоч на тот завод роботи у базену нє було так вельо як на порядним ярнїм чисценю, учашнїки демонстровали цали процес тей роботи, а розуми ше, у нєй участвовал и водитель Виктор Савич хтори бул и главна гвизда тей подїї.

Циль сериялу З веслом през Войводину же би ше промововало плївни драги Войводини през мрежу беґельох и їх интересантносци, живи штредок и еколоґийни елементи, а з тим и войводянску мултикултуралносц.

Браво и похвала за шицких школярох хтори участвовали!