АНАСТАЗИЯ КОЗАР ⁣
⁣
У предлуженю пречитайце єй поруку шицким терашнїм и будуцим школяром. ⁣
⁣
Мойо мено Анастазия Козар, мам 18 роки и жиєм у Кули. Мам родичох Тат’яну и Николу, и мам родзеного брата Алексу. ⁣⁣
⁣
Мойо школованє сом започала у основней школи „Петефи бриґада” у Кули. У тей школи, пред точно штирома роками, була сом преглашена за школяра ґенерациї. То резултат моїх вельочислених дипломох зоз математики, физики, историї, сербского и руского язику… То була лєм єдна ґарадича мойого напредованя и преширйованя знаня. ⁣⁣
⁣
Зоз цильом же бим и далєй була медзи найлєпшима, наставела сом ше вредно учиц и намагац у нашей ґимназиї „Петро Кузмяк” у Руским Керестуре. ⁣
⁣
Ишла сом на општински змаганя зоз математики и физики на хторих сом достала рижни дипломи. Попри тих змаганьох, вецей раз сом участвовала у квизох зоз биолоґиї и математики и ту сом зоз своїма товаришами, у тиму, доставала красни награди. ⁣⁣
⁣
Кед сом уписала треци рок, шицких нас знашла пандемия корона вирусу и прешли зме на онлайн наставу. Прето вецей нє були орґанизовани змаганя и шицки активносци вязани за школу. Шицко тото тирвало до конца штвартого року и прето сом нє могла участвовац и указовац свойо знанє, гоч сом мала барз вельке жаданє. ⁣⁣
⁣
Нєшка сом преглашена за школяра ґенерациї, по другираз.
⁣
Цо вам то гутори? Можем вам повесц же кед дацо сцеце барз и понамагаце ше и робице на себе, абсолутно шицко можлїве. ⁣⁣
⁣
Ище єден мой циль виполнєни, а понамагам ше и у дальшим школованю, на факултету, же бим напредовала и обогацовала свойо знанє, преширйовала горизонти и була порихтана за живот котри ме чека! И запаметайце: „Нє битне кельо раз сце у живоце спадли, алє чи сце после того станули!”