Дня 20. априла 2021. керестурску ґимназию нащивел професор др Михайло Фейса зоз Оддзелєня за русинистику Филозофского факултета зоз Нового Саду зоз цильом приблїжиц матурантом предносци студираня на своїм мацеринским язику, у малих ґрупох и индивидуалним приступе роботи професорох зоз студентами. Професор Фейса потолковал способ роботи, активносци будуцих студентох, можлївосци доставаня роботи после закончених студийох на интересантни способ хтори блїзки штрдньошколцом преткани зоз гумором и наводзеньом предносцох студентского живота у Новим Садзе.

Професор матурантом принєсол на дарунок Словнїк компютерскей терминолоґиї и кнїжку – Виреченьово конструкциї у руским и английским язику. Єдну часц кнїжкох подаровал и школскей библиотеки и подзелєл просвитним роботнїком.