Школяре зоз предлуженого пребуваня зоз свою учительку Славку Гайдук  15. децембра правели медовнїки  хтори предавали  16. децембра  на  крачунско- новорочним вашаре. Материял и прибор за роботу (муку, цукер, цимет,розвалку, фартущок, хлєбовку, ванґлочку, фурмочки ) принєсли школяре и учителька (мед, марґарин, вайца, присмачки, фарби, розвалку, фартущок, хлєбовку, ванґлочку, мисочки, мещки за цифрованє, фурмочки).

Цесто школяре загнєтли зоз учителькову помоцу, добре го виробели и вец по упутству и зоз помоцу учительки кед требало, розганяли кажде на своїм ручнїчку до одредзеней грубини.  Шлїдуюца фаза роботи була  видлобованє жаданих формох  зоз рижнима фурмочками. Медовнїки зме кладли на тепши за печенє, хтори зме достали зоз школскей кухнї. Були зме вредни – направели зме штири вельки тепши медовнїки! Шицки школяре наисце вредно робели, радосни же робя цошка цо ище нє робели, цешели ше же и предлужене пребуванє будзе предавац на вашаре и так помогнє же би ше назберало вецей пенєжи за гуманитарну акцию.Медовнїки упекли нашо кухаре у школскей кухнї Михайло Орос и Олена Виславски.

Ушлїдзела найкрасша и найкреативнєйша часц  – цифрованє медовнїкох! У тей роботи зме шицки наисце уживали и кажде мал нагоду витвориц креативносц. Медовнїки ”oжили”, достали святочни випатрунок.

За вашар зме их крашнє  попаковали , а на вашаре були швидко предани. Заробели зме 850 динари хтори  придати за  гуманитарну помоц .

Сцем похвалїц школярох, бо наисце дзечнє робели, були вредни, креативни и барз задовольни же научели цошка нове и робели цошка хасновите, а за нїх и нєкаждодньове. Мушим надпомнуц же зме и покоштовали медовнїки, були барз смачни, рецепт у прилогу.

Медовнїки

400ґрами муки, 140 ґрами млєтого цукру, 60 ґрами марґарину, 2 вайца, 2 ложки меду, 1 ложичка содабикарбони, 1 цимет, 1 ложичка присмачки за медовнїки. Загнєсц и най стої 24 годзини уфрижидеру. Розогнац на цеко, правиц жадани форми и печиц 8 минути на 180 ступнї.

Ґлазура

1 бильчок витрепац дакус, додац 200 – 250 ґрами млєтого цукру и 1 ложку лимунового соку и трепац док нє загушнє. Цифровац, по жаданю мож зафарбиц ґлазуру.

СМАЧНОГО!

Славка Гайдук