Основна и штредня школа зоз домом школярох ,,Петро Кузмяк“ зоз Руского Керестура того року своїх школярох, напряма Туристично-готелиєрски технїчар, пошлє окончовац порядну професионалну праксу до Солуну.

Школяре, хторих будзе провадзиц професор, два тижнї буду окончовац праксу у готелу и у туристичней аґенциї у Солуну. Шицко тото орґанизовал Центер за цаложивотне ученє ,,Иподоми“ зоз Солуну.
По словох помоцнїци директора Лїляни Фини, така пракса то часц проєкту Еразмус+ на хтори школа конкуровала штредком фебруара.

-Школа ношитель проєкту у сотруднїцтве зоз Центром ,,Иподоми“ зоз Греческей хтори будзе домашнї нашим школяром. Радуєме ше витвореню того проєкту, понеже жадаме нашим школяром дац найлєпши квалификациї за дальшу роботу. После оконченей пракси школяре здобуду Европски сертификат хтори у векшей мири збогаци їх биоґрафию, гварела Фина.

Професоре фахових предметох и страних язикох уж анґажовани на пририхтованю школярох за путованє хторе би требало буц реализоване у октобру того року.

Фина додала же ше Школа на шицки способи намага вихасновац нагоди хтори понукаю европски проєкти же би нашим школяром понукла найлєпше образованє и нагоду за напредованє и усовершованє. Окрем же є помоцнїца директора, Лїляна Фина и координатор проєктного тиму.

Вредносц того проєкту 35.000 евра.