У населєним месце Руски Керестур нєшка окончена дезинфекция у Дому школярох у штреднєй школи „Петро Кузмяк“. Предсидатель општини Кула Дамян Милянич гварел же то порядни обиход Руского Керестура, Месней заєднїци и активносцох хтори окончує ЯКП „Руском“ Руски Керестур, а нєшка обидзени и Дом школярох же би ше видзело у яким є станю. Важне же Дом дезинфиковани, празни и порихтани, як єдно од можлївих местох, накадзи то будзе потребне, за змесценє особох котри буду изоловани док руши масовне тестиранє на корона вирус, заключел Милянич.

Директор Дома здравля Кула Др Жарко Шевин гварел же змесценє у школярским Дому потполно виполнює просторни и технїчни стандарди и додал же ше наздава же до реализациї нє придзе, алє же ше рихтаме за сценарио у хторим треба же би ше одредзене число пациєнтох зоз лєгчейшу клїнїчну слику змесцело на изолацию. Дохтор Шевин гварел же по тоту хвильку нєт податки хтори указую на тото же єст пациєнтох хтори охорели од корона вирусу у општини Кула и заш апеловал на гражданох хтори у изолациї, же би почитовали правило и же би 14 днї були у одсуству було якого социялного контакту.