Школяре другей класи ґимназиї зоз свою професорку Лїляну Фину на годзинох оддзелєнского старшини порушали активносци под назву Start–up през хтори ше школяре блїзше упознали зоз поднїмательством хторе Министерство просвити препознало як єдну од ключних компетенцийох хтора треба же би ше розвила при школярох по реформованей програми за ґимназиї.

Перша активност ше отримала у школи кед школяре поробели инициялни тест, односно преценєли свойо поднїмательни схопносци, а после того им професорка фахових предметох Аника Войчена потолковала цо то поднїмательство и дала приклади познатих шветових и домашнїх поднїмательох.

Друга по шоре активносц планована же би ше отримала у Општини дзе будзе бешедовац Милош Данилов, хтори представитель Канцелариї за локални економски розвой, о поступкох и процедурох за отверанє приватного подприємства як и о потенциялних жридлох финансованя.

У другим полрочю планована активносцто виробок бизнис плана. Як конєчни резултат требало би же би школяре основали виртуалне подприємство, а циль того мини-проєкта то же би ше школяре упознали зоз цалим процесом од идеї до реализациї и же би розвили поднїмательни дух.

Таки активносци представяю приклад добрей пракси сотруднїцтва медзи школами и єдинками локалней самоуправи же би ше школяре оспособели за дальше образованє и преберанє активней улоги граждана у сучасним дружтву.