Тих дньох до нашей школи сцигло вельке припознанє зоз Бриселу, бо зме вибрани за школу амбасадора проєкта STEM school label. У активносцох того проєкта участвовало 300 европски школа, а наша школа се истакла медзи 20 найлєпших кед у питаню иновациї у настави природних предметох и математики. З тей нагоди директорка Хелена Пашо Павлович и професорка математики Наталия Будински були од 20. до 22. септембра у Бриселу дзе мали нагоду розменїц искуства у обласци иновацийох у настави зоз наставнїками и директорами школох зоз цалей Европи. Наша школа вошла до проєкту прешлого року у септембру и у цеку рока орґанизовани велї активносци зоз обласци природних предметох и математики, а хтори наишли на препознаванє як квалитетни на европским уровню и принєсли школи тото припознанє.