Школярки зоз напряму туристични технїчар школи ,,Петро Кузмяк“ Руски Керестур, Кристина Калмар, Недич Даяна и Тркля Николина зоз менторску роботу професорки Аники Войчена, завжали перше место на змаганю  ,,Медзинародни днї школярского поднїмательства – Сокобаня 2019“.

После успишно одробеного проєкту промоциї Сокобанї и високого ранґованя, тот тим вошол медзи дзешец найлєпших и пласовал ше до другей часци змаганя дзе свойо идейне ришенє рекламного спота Сокобанї и реализовали.

Зняли рекламни спот, а у тим им нєсебично помогли Патрициа Войчена, школярка другей класи основней школи, школяре зоз класи Марияна Травиа и Иґор Манойлович як и оддзелєнски старшина Бояна Милянич. Потримовку за музичну часц дала им професорка Сашка Спасич.

Школярки зоз ментором и оддзелєнским старшином одпутовали до Сокобанї дзе була и остатня часц змаганя – презентованє реклами и одбрана плану промоциї пред фаховим жирийом. Їх реклама и цали проєкт оценєни заз максималним числом бодох и преглашени як найлєпши того року.