Репрезентация Сербиї, у чиїм составе була и школярка з Руского Керестура, Леонела Цифрич, завжала штварте место у Европи на змаганю з транспорту за школярох од 10 до 12 роки. Змаганє отримане у Ческей, у Усти на Лаби нєдалєко од Праги.

У екипи Сербиї були штверо найлєпши школяре – побиднїки державного змаганя отриманого у маю. Пририхтованя отримани од 23-30. авґуста у Беоґрадзе, були барз интензивни и тирвали по дзешец години дньово. Школяре ше за Евроспке змаганє мали пририхтац з обласци познаваня транспорта, з теорийней и практичней часци.

У конкуренциї екипох з 23-ох европских державох, хтори творели по два дзивчата и двоме хлапци, репрезентация Сербиї завжала одличне 4. место зоз 600 бодами, цо барз добри успих..

Попри дванацрочней Леонели Цифрич, котру за змаганє пририхтовал и провадзел наставнїк у керестурскей Школи „Петро Кузмяк” Зденко Шомодї, члени нашей репрезентациї були и дванацрочна Миляна Веселинович з Нишкей Банї, дзешецрочни Никола Йович з Нишу и єденацрочни Петар Лукич зоз Сримскей Митровици.

Кажди учашнїк на змаганю достал по 25 рижни робни награди як цо то маїци, шапки, руксаки, шлеми…

З нагоди освойованя одличного штвартого места, школярох основней школи привитала подпредсидателька Влади Сербиї и министерка за будовательство, транспорт и инфраструктуру Зорана Михайлович .

Даскельо днї потим и Предсидатель Сербиї Томислав Николич тиш приял побиднїкох державного змаганя „Цо знаш о транспорту”, котри творели репрезентацию Сербиї сообщене з Кабинету предсидателя, а пренєсли и нашо медиї.

Керестурци предсидательови Сербиї подаровали кнїжку „Лїтопис и история Руски Керестур 1754-1991” Юлияна Тамаша, малюнок Водици керестурского маляра Янка Бикия, туристичну брошуру Керестура, фляшку и погарики з мотивами руского партку, хтори виробели жени з „Байки”, як и промотивни материял Школи „Петро Кузмяк”.

Успих котри зазначела Леонела Цифрич и єй наставнїк Зденко Шомодї потераз найвекши успих котри наша школа посцигла на даєдним змаганю.