Титулу школяра ґенерациї, як єй и саме мено гутори — достава лєм єден школяр у цалей ґенерациї. Tого року ю подполно залужено достала Ребека Сабадош, школярка 8а класи.

Вона до своєй школи принєсла велї дипломи, припознаня и подзекованя зоз рижних предметох. Гоч єй дружтвени науки баржей одвитую, визначела ше и у природних наукох.

Верим же таки успих заслужела нє прето же вона єдна зоз тих котра муши буц лєпша од других. Алє прето же учела пре себе. Як єй класна, мам чувство же би Ребека нє могла на мире спац кед би на даєдно питанє нє знала одвит. Таке ше при нєй нє могло случиц.

А яка є добра школярка, така є добра и товаришка. Зоз своїм справованьом указала же окрем за кнїжку, зна и за друженє и франту. Каждого привитала зоз щирим ошмихом на твари, и розбивала ляд у комуникациї. Кед ишла на змаганя, нє була од тих котра преценьовала конкуренцию, алє склапала нови приятельства. Праве пре таке становиско, зоз векшини змаганьох принєсла красни памятки, а диплома була лєм бонус.

Ребеки, як и шицким школяром хтори закончую основну школу, дзекуєм на красних памяткох, а тоти нє таки красни ше швидко забуваю. Жичим вам вельо успиху у дальшим школованю!

— класна, Оливера Винаї