Портал Моя штредня школа представя платформу котра Вам оможлївює окончиц електронски услуги у вязи примацого испиту, закончуюцого испиту и уписованьом до першей класи штреднєй
школи за 2021/22. рок, за школи чий снователь Република Сербия, Автономна покраїна або єдинка локалней самоуправи, зоз винїмком за музични, балетни и специялни школи.

На порталу Моя штредня школа: https://mojasrednjaskola.gov.rs можеце превериц шицки евидентовани податки за конкретного школяра, алє и пренайсц шицки статистични податки о основних и штреднїх школох, як и други информациї котри можу помогнуц при правилним виборе будуцей школи. У складзе зоз Календаром уписних активносцох, на дньовим уровню можеце провадзиц главни актуалносци.

Же бисце хасновали електронски услуги, нєобходне же бисце були авторизовани хаснователь. Авторизовани хаснователь може буц виключно родитель або други законски заступнїк котри ма одвитуюци права приступу ґу податком о конкреному школярови прейґ налоґу на Порталу Мой есДньовнїк (Мој есДневник). Односно, кед же маце налоґ на порталу Мой есДньовнїк (Мој есДневник) або маце налоґ на Националним порталу за електронску идентификацию eID.gov.rs, зоз котрим приступаце ґу порталу Мой есДньовнїк (Мој есДневник), оможлївени шлїдуюци електронски услуги:

1. Подношненє електронскей прияви за покладанє примацих испитох
2. Подношенє пригварки на резултати закончуюцого испиту
3. Подношенє електронскей лїстини жаданьох
4. Подношенє електронскей прияви за упис до штреднєй школи

Налоґ на есДньовнїку можеце достац од оддзелєнского старшини у основней школи, а налоґ на державним порталу за електронску идентификацию можеце сами креировац зоз реґистрованьом на eID.gov.rs.

Поволуєме Вас же бисце, у складзе зоз епидемиолоґийну ситуацию, а скорей шицкого, пре здравє и безпечносц, хасновали розполагаюци електронски услуги у вязи зоз процедурами за упис до штреднєй школи. Вшелїяк, шицки вимоги сце годни поднєсц и на стари способ, нєпоштредно у школи.